BSNL 5G Service Release date

पंतप्रधान नरेंद्र मोदी यांच्या हस्ते 1 ऑक्टोबरपासून देशात 5G इंटरनेट सेवा सुरु करण्यात आली. पहिल्या टप्प्यात देशातील प्रमुख 13 शहरांमध्ये 5G सेवा सुरु केली जाणार आहे. त्यानंतर हळुहळू या सेवेचा विस्तार केला जाणार असल्याचे ‘रिलायन्स जिओ’कडून सांगण्यात आले आहे.

देशातील खासगी टेलिकाॅम कंपन्या 5G सेवेची तयारी करीत असताना, सरकारी ‘बीएसएनएल’ आता कुठे 4G लाँच करीत आहे. सध्या ‘बीएसएनएल’ (BSNL) घरघर लागली असली, तरी आजही अन्य कंपन्यांच्या तुलनेत ‘बीएसएनएल’ची सेवा स्वस्त आहे. अशात एअरटेल (Airtel), जिओच्या (Jio) गोटात खळबळ उडविणारी बातमी येत आहे.

वर्षभरात सुरु होणार..

पुढील काही दिवसांतच ‘बीएसएनएल’चीही 5G सेवा सुरु केली जाणार आहे. खुद्द केंद्रीय दूरसंचार मंत्री अश्विनी वैष्णव यांनी ‘इंडिया मोबाईल काँग्रेस’च्या कार्यक्रमात ही घोषणा केली. गावाेगाव नेटवर्क असलेली ‘बीएसएनएल’ 5G सेवा 15 ऑगस्ट 2023 पासून सुरु करणार असल्याचे वैष्णव यांनी सांगितले..

विशेष म्हणजे, अजून 4G सेवाही सुरु झालेली नसताना, ‘बीएसएनएल’ वर्षभरात 5G सेवेचे लक्ष्य कसे गाठणार, या प्रश्नावर मंत्री वैष्णव म्हणाले, की 4G वरून 5G वर जाणं खूप कठीण नाही. वर्षभराच्या कालावधीत ते साध्य केलं जाऊ शकते. ‘बीएसएनएल’ची 5G नेटवर्क सेवा ‘नॉन-स्टँडअलोन आर्किटेक्चर’वर आधारित असेल. त्यात ऑपरेटर कमी गुंतवणुकीत सध्याच्या नेटवर्क पायाभूत सुविधांचा जास्तीत जास्त वापर करू शकतील, असे ते म्हणाले.

देशातील 5G सेवेबाबत बोलताना ते म्हणाले, की पुढील 6 महिन्यांत 200 शहरांत 5G सेवा पोहोचणार आहे. तसेच, पुढील दोन वर्षांत देशातील 80 ते 90 टक्के भागात 5G सेवा गेलेली असेल, शिवाय ही सेवा ग्राहकांना परवडणाऱ्या किंमतीत मिळणार असल्याचेही वैष्णव म्हणाले..